പടയണി തുടങ്ങുന്ന ചിങ്ങത്തിലെ തിരുവോണത്തിന്റെ പിറ്റേദിവസം അവിട്ടം നാള് രാത്രി ഒരു 9 മണിയാകുമ്പോള് കാണാം ഒരാള് ക്ഷേത്രമതില്ക്കെട്ടിനു വെളിയിലേക്ക് തള്ളി നില്ക്കുന്ന ആനക്കൊട്ടിലിന്റെ തിണ്ണയില് ഒരു കറ്റ ചൂട്ടുമായിരിക്കുന്നത്. മറ്റാരുമല്ല സാക്ഷാല് യേര്തൂട്ട് കൃഷ്ണപിള്ള ചേട്ടന് തന്നെ. ക്ഷേത്രത്തിലേക്ക് ചൂട്ടു കറ്റയുമായി വരുന്നവരെയെല്ലാം നോക്കി അങ്ങനെ രസിച്ചിരിക്കുന്നു. അദ്ദേഹമാണ് കാലാകാലങ്ങളായി പതിനാറു ദിവസം വ്രതം അനുഷ്ഠിച്ചു അവസാനം പൂരം നാളില് വിളക്കിതിരിയും ചോറും വയ്ക്കാന് അധികാരമുള്ള പടയണിയിലെ പ്രധാന ആചാര്യന്. അവിട്ടം നാളില് ക്ഷേത്ര മേല്ശാന്തി ശ്രീകോവിലില് നിന്നും പകര്ന്നു നല്കുന്ന അഗ്നി പടയണിക്കളത്തിലേക്ക് ആവാഹിച്ചു ചൂട്ടുകറ്റകളിലേക്ക് പകരുന്നതും ഈ ആചാര്യന് തന്നെ. അദ്ദേഹത്തിന്റെ ഉത്തരവാദിത്വങ്ങള് അവിടം കൊണ്ട് തീരുന്നില്ല.
പുത്തന് അന്നങ്ങള് നടയ്ക്കു വയ്ക്കുന്ന മുറക്ക് അത് വരിയാന് മുന്പന്തിയില് തന്നെ കൃഷ്ണപിള്ള ആശാന് ഉണ്ട്. ഈറല് കീറി കൊടുക്കുന്നതാണ് ഇദ്ദേഹത്തിന്റെ പ്രധാന പണി. ഈ പതിനാറു ദിവസവും പ്രായാധിക്യം ഒക്കെ അവഗണിച്ചു അദ്ദേഹം രാവിലെ തന്നെ പടയണിക്കളത്തില് എത്തും. എല്ലാവര്ക്കും പ്രചോദനമായി പണികള് തുടങ്ങും. പൂരത്തിന്റെ അന്ന് ഉച്ചക്ക് ശേഷം വലിയ അന്നങ്ങളുടെ വന്നം വെട്ടുക എന്നൊരു ഏര്പ്പാടുണ്ട്. അല്പം കരകൌശലം ഉണ്ടെങ്കിലെ വാഴപ്പോളയില് അത് വെട്ടിയെടുക്കാന് സാധിക്കൂ. അന്നങ്ങളുടെ തൂവലായി വിലസുന്നത് ഈ വന്നങ്ങള് തന്നെ. വന്നം വെട്ടുന്നതില് ബഹുകേമന് ആണ് നമ്മുടെ ഈ ആശാന്. കുടനിര്ത്ത്, പ്ലാവില നിര്ത്ത്, മകം പടയണി, പൂരം പടയണി എന്നീ ദിവസങ്ങളില് നടക്കുന്ന കുടംപൂജ കളിയില് പാട്ടുകള് പാടി കൊടുക്കുന്നതും ഈ ആചാര്യന് തന്നെ.
(തുടരും)
3 comments:
ആചാര്യന്മാര് ഇല്ലെങ്കില് എന്ത് പടയണി? ഇങ്ങനെ തലമുറകളായി ഓരോ ആചാര്യരും കൈമാറി വന്ന സുകൃതം ഇന്നും നീലമ്പേരൂര് സ്വദേശികള്ക്ക് കൈമോശം വന്നിട്ടില്ല എന്ന് പറയുമ്പോ അത് അഭിമാനം തന്നെയാണ്, പുണ്യമാണ്.
നല്ല ഉദ്യമം,തീര്ച്ചയായും ആചാര്യന്മാരെ ഇവിടെ പരിച്ചയപ്പെടുതണ്ടത് ആവശ്യമാണ്.ഇതുപോലെയുള്ള അനേകരുടെ നിസ്വാര്ത്ഥ സേവനത്തിന്റെ പരിണിത ഭലമാണ് ഇന്നുകാണുന്ന പടയണി.പുതിയ തലമുറയ്ക്ക് തേനും വയമ്പും നാവില് നല്കുന്നവര്.
good and we need to hear more from these people to knew about about their masters and this way we can create a bit history on to it.
There experience might be more thrilling.
Post a Comment